Policia e Kosovës ka arrestuar shtatëmbëdhjetë të dyshuar në tri rajone të ndryshme për përfshirje në veprimtari penale.

“Policia, konkretisht Njësia për Hetimin e Trafikimit me Qenie Njerëzore (NjHTQNj)-Prishtinë, pas një hetimi paraprak, me datë 28.08.2018 ka zbatuar një plan taktik ku ka arrestuar 14 (katërmbëdhjetë) të dyshuar”, thuhet në njoftimin e policisë.

Prej të arrestuarve janë dy femra dhe një mashkull të dyshuar për përfshirje në veprat penale “Mundësim ose Detyrim në Prostitucion” dhe “Ofrim i lokaleve për Prostitucion”.

Kurse 11 të dyshuar të tjerë janë arrestuar për “Marrje me Prostitucion”.

Lidhur me rastin është njoftuar prokurorja  kujdestare, me aktvendimin e të cilës të  dyshuarit  janë liruar në procedurë të rregullt.

“Po ashtu, më 28.08.2018 NjHTQNj-Ferizaj, pas një hetimi të bërë, ka arrestuar një të dyshuar për përfshirje në veprën penale “Mundësim dhe Detyrim në Prostitucion”. Në konsultim me prokurorin e rastit të Prokurorisë Themelore Ferizaj,  i dyshuari lirohet ndërsa lënda shkon në procedurë të rregullt”, vazhdon më tej njoftimi.

Kurse në rajonin e Gjilanit, policia ka arrestuar dy persona për shkak të dyshimit të bazuar për “Marrje  me Prostitucion”, shkruan FaktePlus.

Personat e arrestuar, pas kompletimit të rastit janë dërguar me procedurë të shpejtë në Gjykatën Themelore në Gjilan.

“Policia mbetet e përkushtuar në realizimin e detyrave të saj kushtetuese e ligjore për të ofruar rend dhe siguri publike, luftuar aktivitetet kriminale, përfshirë trafikimin me qenie njerëzore”, thuhet në fund të njoftimit të policisë.